Најдобрите македонски одбојкари подготвени за работа пристигнаа во Струмица, а она што се надеваат е дека ќе направат чекор напред во настапите во Златната Европска лига, која ќе им овозможи позитивно да влезат и во евро-квалификациите.

Според планот репрезентацијата една недела ќе тренира во салата „Парк“ во Струмица, а потоа патува за Марибор, Словенија каде на 24 и 25 мај ќе одигра пријателски двомеч со селекцијата на Хрватска, како проверка на силата во пресрет на натпреварите од Златната Европската лига.

– Секогаш кога почнуваме едно ново поглавје за мене претставува голема среќа и многу сум среќен, возбуден и мотивиран за она што претстои. Првите впечатоци и првите разговори велат дека момците се супер, сите сме добри, попладнево ќе го одработиме и првиот тренинг. Јас сум оптимист, ако не бев немаше да бидам овде и се надевам дека ќе успееме да имаме здраво, а потоа и резултатски добро лето. Од ден во ден почнувајќи од денеска би сакал репрезентацијата да се вклопи, да живее како едно и да напредуваме, да се воигруваме што е можно подобро. Не можам да ветам ништо од старт или да најавувам фајнал-фор бидејќи тоа е преголем залак, во моментов, можеби за три недели нема да биде.

Во Европската лига од никого нема да се плашиме и пред никого нема да излеземе со бело знаме и против секого ќе играме за победа, тоа јас можам да го ветам. Што се однесува до Грузија и Грција, тоа е далеку од сега, но нема дилеми дека сите потсвесно мислиме и на тоа. Сега би размислувал од ден на ден, што побрзо да се најдеме, бидејќи некој имал два месеци пауза, некој пет дена и мора да се воиграме што е можно подобро и да излеземе на мегдан. Пријателскиот двомеч со Хрватска е одлична подготовка во пресрет на Златната лига, според мене колку повеќе натпревари играме заедно, толку подобро и верувам дека тоа ќе ни помогне да го набилдаме натпреварувачкиот дух во пресрет на првиот турнир – вели капитенот на репрезентацијата, Никола Ѓоргиев.

Третата година во низа како дел од силното континентално натпреварување машката репрезентација го започнува викендот од 6 до 8 јуни во Братислава, Словачка, каде Македонија ќе ги измери силите со домаќинот на првиот турнир и селекцијата на Финска. Вториот турнир одбојкарите го играат една недела подоцна од 13 до 15 јуни во Рига против Летонија и Грција. Македонија ќе биде домаќин на еден од трите турнири во третиот викенд од годинешното издание, кога од 20 до 22 јуни во салата „Парк“ во Струмица, ќе ги пречека Црна Гора и Израел.

Миленкоски: Во последните две години играме меѓу најдобрите европски репрезентации во Златната лига