Ракометарките од Ѓер од Унгарија и Оденсе од Данска се пласираа во финалето на завршниот турнир од Лигата на шампионите во женска конкуренција, што се одржува во Будимпешта.

Ѓер во првото полуфинале го победи Есбјерг со 29:28 (17:15), додека Оденсе го совлада Мец со 31:29 (27:27, 13:16) по продолженијата.

Дебитирајќи на Фајналфорот, данскиот Оденсе направи изненадување победувајќи го Мец, со што заврши серијата од 15 последователни победи.

Мец го имаше последниот напад во натпреварот и шанса да слави во рок од 60 минути, но не успеа. Во продолжението, Оденсе беше подобар и го доби тој дел од натпреварот со 4:2.

Оденсе до победата го предводеа Тале Деила со шест, и Малин Ауне, Елма Халилчевиќ и Елвер Хагесо со по четири гола, додека Ема Жак, Сара Буктит и Лена Грандво беа најефикасни кај француската страна со по пет гола.

За Оденсе, пласманот во финалето е најголем успех, додека од друга страна, Ѓер ќе игра во своето 11 финале во ЛШ каде шест пати се искачи на врвот.

Во унгарскиот тим најефикасни беа Холанѓанката Дионе Хушир со седум гола и Французинката Естел Нзе Минко со пет гола. Французинката Хатаду Сако собра пет одбрани, но можеби и клучниот зицер при резултат 28:27, на минута и пол пред крајот на мечот.

На спротивната страна за Есбјерг Норвежанката Хени Рајстад се истакна со седум, и нејзината сонародничка Лив Рушфелд Деила и Холанѓанката Јудит ван дер Хелм со по четири гола.