Френки де Јонг веќе потпиша за Барселона, а најверојатно неговите стапки ќе ги следи и најбараниот дефанзивец во моментов, Матијс де Лихт.
Според каталонскиот весник „Спорт“, Барселона и фудбалерот ги договориле деталите околу платата, а понудата до Ајакс изнесува 75 милиони евра и се очекува да биде прифатена.

Голем интерес има и за ангажман на српскиот репрезентативец Душан Тадиќ, кој има фантастична сезона и на 49 натпревари има постигнато дури 32 голови. Најзагреани за неговите услуги се италијанските Милан и Интер како и неколку екипи од Премиер лигата, предводени од Тотенхем, Арсенал и Евертон.

Дони Ван де Бек се наоѓа на радарот на Милан, кој понуди 25 милиони евра за неговите услуги. Од Ајакс не сакаат да слушнат за понуда пониска од 50 милиони евра, сума која Арсенал е подготвен да ја плати.

Последен играч кој со сигурност би требало да го напушти холандскиот тим е мароканскиот репрезентативец Хаким Зијеш. Цената за стрелецот на 19 голови сезонава се движи помеѓу 35 и 40 милиони евра. Најзаинтересиран за негов ангажман е Интер, но ќе има голема конкуренција во англиските гиганти, Ливерпул, Манчестер сити и Манчестер јунајтед кои најавија дека нема да жалат пари за да дојдат до потписот со Мароканецот.