Кралот Чарлс Трети ја откри статуата на кралицата Елизабета Втора во Јорк, прва поставена по нејзината смрт, објави Би-би-си.

Скулптурата, која е висока два метри, била дизајнирана со цел да го прослави платинестиот јубилеј на покојната кралица и била завршена во август годинава, еден месец пред нејзината смрт.

Говорејќи пред толпата во Јорк, кралот Чарлс рече дека сега нејзиниот лик ќе го „бдее“ градот.

„Покојната кралица секогаш се грижеше за благосостојбата на својот народ во текот на нејзиниот живот. Сега нејзиниот лик ќе внимава на она што ќе биде Плоштад Кралица Елизабета Втора во вековите кои следат“, изјави кралот Чарлс за време на церемонијата.

Статуата тежи речиси два тона и е направена од француски варовник. На неа е прикажана кралицата, облечена во својата витешка наметка и државната дијамантска дијадема.

Имено, самата кралица Елизабета го избрала дизајнот на статуата, која требало да биде откриена во септември годинава, но церемонијата била одложена поради смртта на кралицата.