Улиците на градот Бунол, во Источна Шпанија беа преплавени со црвен доматен сок во средата, додека луѓето фрлаа презреани домати еден на друг на традиционалниот фестивал „Ла Томатина“, кој привлече толпа луѓе.

Пливање во сос од домати, фрлање домати еден на друг, па дури и правење „доматни ангели“, се дел од активностите во кои се вклучија илјадници за време на шпанскиот фестивал.

Околу 22.000 учесници облечени во бела облека попрскана со пулпа од домати учествуваа во лудилото што го зафати Бунол, 40 километри западно од Валенсија, секоја година во последната недела од август.

Thousands of people gathered in Bunol, Spain, for the annual La Tomatina festival ?

The ‘world’s biggest food fight’ sees participants hurl tomatoes at each other. pic.twitter.com/ocN0IhDbp6

— Sky News (@SkyNews) August 28, 2024

Седум камиони испорачаа 150 тони зрели домати, кои беа поделени на учесниците на фестивалот, од кои голем дел дојдоа од странство. Сите кои не живеат во Бунол плаќаат такса од 15 евра, додека локалните жители уживаат бесплатно.

По завршувањето на „битката“, екипа за чистење беше испратена да ги исчисти улиците од доматите. Доматите кои се одгледуваат специјално за фестивалот се сметаат за премногу кисели и не се погодни за консумирање од страна на луѓето, пишува „Би-би-си“.

Според официјалната веб-страница на „Ла Томатина“, фестивалот е основан во 1945 година. Сѐ започнало со тепачка кога млади луѓе кои се обиделе да ја видат парадата одблиску собориле еден од учесниците. Неколку луѓе земале домати од блискиот штанд и ги користеле како импровизирани проектили додека полицијата не воспоставила ред.

Следната година младите повторно ја организирале „битката“, а некои донеле и сопствени домати. Настанот бил накратко забранет во 1950-тите под фашистичката диктатура на генералот Франциско Франко, но продолжил во 1959 година со одредени правила.