Царинската управа соопшти дека при контрола на стока пријавена за транзит на граничниот премин „Богородица“ биле запленети 1.158 часовници со ознаки на познати трговски марки како „Ролекс“, „Бос“, „Армани“ и „Томи Хилфигер“, соопшти Царинската управа.

Цариниците на граничните премини и мобилните царински тимови годинава, заклучно со септември, открија 63 случаи на повреда на право од интелектуална сопственост, при што запленети се речиси 78.000 производи со потпис на познати трговски марки. Од нив во 37 случаи веќе е утврдено дека станува збор за фалсификати на вкупно 27.329 производи.

„Годинава, заклучно септември, откривме 63 случаи на повреда на право од интелектуална сопственост, што е за над 40 отсто раст во однос на минатата година кога во овој период се откриени 44 случаи на повреда на право од интелектуална сопственост. Половина од случаите, или точно 32 случаи, годинава се откриени од нашите мобилни царински тимови. Овие резултати јасно ги потврдуваат нашите напори во борбата против трговија со фалсификати“, вели директорот Бобан Николовски.