Речиси една деценија, Лија Мекензи (36) и нејзиниот сопруг Кајл (34) го нарекуваат океанот свој дом. Тие пловат низ светот на 45-годишна едрилица, далеку од притисоците на модерниот живот.

Тие испловиле пред осум години и оттогаш не се свртиле назад. Нивниот неконвенционален начин на живот неодамна привлече големо внимание на интернет, откако Лија сподели фотографии од своите патувања на социјалните мрежи, пишува „Њузвик“.

Го продале недвижниот имот и купиле едрилица

„Дали ова се смета за див дом? Мојот партнер, нашите три миленици и јас живееме на оваа 45-годишна едрилица осум години, патувајќи низ светот. Океанот е наш двор“, напиша таа покрај фотографиите што прикажуваат сцени од нивните рути – од Канада и Алјаска до Француска Полинезија и Вануату.

Лија, поранешна автомеханичарка, и Кајл, сметководител, поминале години трансформирајќи ја својата едрилица во самоодржлив дом на море.

– Идејата да работам додека не се исцрпам, да добијам само две недели одмор, а потоа да се пензионирам премногу стара за да правам што било, едноставно не ми се допаѓаше. Ми требаше промена, а пловењето околу светот звучеше како сон што се оствари – објасни Лија.

Нивното патување започнало скромно, на едрилица од 9 метри.

– Тоа прво пловење околу канадските острови беше неверојатно. Бев зависна и сакав да се преселам и да пловам околу светот – се присетила таа.

Набргу потоа, тие ги продале сите свои работи, ги отплатија долговите и го купиле својот сегашен брод – едрилица од 13 метри наречена „Џубел“.

– Во првите неколку години, сè уште работевме, го поправавме бродот, штедевме пари и пловевме околу Ванкувер – рекла Лија.

Животот на брод се покажал не само авантуристички, туку и економичен.

– Плативме 700 долари за сите трошоци за живот во срцето на Викторија – додала таа.

Со текот на годините, двојката инвестирала многу во својата едрилица. Тие инсталирале соларни панели, литиумски батерии и постројка за десалинизација што ја претвора морската вода во вода за пиење. Го отстраниле шпоретот на гас и го замениле со електричен индукциски шпорет.

– Опремата ни овозможува да бидеме речиси целосно независни од надворешни извори и да ги задоволиме нашите основни потреби – рекла Лија.

До денес, тие отпловиле повеќе од 30.000 наутички милји, двапати го преминале Панамскиот канал и ги истражиле островите на Јужниот Пацифик.

– Патувањето од Панама до Нуку Хива во Француска Полинезија траело 35 дена –  рекла таа.

Следни на нивната листа на дестинации се Папуа Нова Гвинеја, Индонезија и Јапонија.

И покрај идиличните фотографии, Лија нагласува дека животот на море не е секогаш лесен: „Не е сè околу коктелите на зајдисонце и бикини. Овој живот е исполнет со највисоки височини и најниски падови, а нема многу помеѓу нив.“

Таа, исто така, опиша некои од поопасните ситуации со кои се соочиле, како што е бурата за време на патувањето помеѓу Аитутаки и Ниуе: „Ја изгубивме контролата врз бродот, брановите се превртуваа над нас, а ние пловевме. Моравме да го најдеме и поправиме скршеното јаже на кормилото – сè додека молњите трепкаа околу нас“. Други предизвици вклучуваа ураган, навигација низ неистражени води и средби со вооружени офицери. „Мора да бидете целосно независни. Никој нема да ви дојде на помош насред океанот ако нешто се случи“.

Патувањето со три домашни миленици ги прави работите уште покомплицирани, бидејќи некои земји или не им дозволуваат да влезат или наметнуваат скапи и комплицирани процедури. Сепак, Лија вели дека имаат многу простор на Јубела, со две спални соби и две бањи.

И покрај сè, двојката досега посетила 22 земји. Иако ѝ недостигаат семејството и пријателите, искуството целосно ја променило.

„Да, опасно е, но исто така е и живеењето во град. Предностите дефинитивно ги надминуваат недостатоците и планираме да го правиме ова сè додека е забавно и изводливо“, заклучила Лија, која има резервен план со својот партнер: „Потоа можеби ќе купиме мал моторен чамец и повторно ќе пловиме по водите на северозападниот дел на Пацификот“.