Остатоците на два дански потонати брода од 18 век беа пронајдени на дното на морето во близина на брегот на Костарика. Ова археолошко богатство, откриено за време на подводно ископување во 2023 година, конечно е идентификувано и се знае дека станува збор за два брода со мрачна тајна – биле користени за транспорт и продажба на робови.

Првично се сметаше дека бродовите се пиратски бродови, но анализата на дрво, тули и глинени цевки спроведена од археолози од Националниот музеј на Данска и Музејот на викиншки бродови откри дека станува збор за бродови со имиња „Фридрикус Квартус“ и „Кристијанус Квинтус“, учесници во трансатлантската трговија со луѓе, објави Националниот музеј на Данска.

„Анализите се многу убедливи, па повеќе не се сомневаме дека станува збор за остатоци на два дански брода со робови. Тулите се дански, а истото важи и за дрвото, кое дополнително е јагленисано и саѓи од пожарот. Ова совршено се вклопува со историските извори кои наведуваат дека еден од бродовите изгорел, рекол Дејвид Грегори, поморски археолог и професор по истражување во Националниот музеј на Данска, каде што е раководител на новиот Центар за поморски истражувања.

Грегори ги водеше ископувањата во Костарика заедно со Андреас Калмајер Блох, поморски археолог од Националниот музеј на Данска, кој помина неколку години истражувајќи го потеклото на бродовите.

„Ова е најлудото археолошко ископување во кое сум учествувал досега. Не само затоа што е од големо значење за локалното население, туку и затоа што е еден од најдраматичните бродоломи во историјата на Данска, а сега точно знаеме каде се случил“, рече Калмајер Блох.

Примероците од ископувањата беа анализирани во Националниот музеј на Данска и на Универзитетот во Јужна Данска, и тие потврдуваат што велат историските извори за историјата на бродовите.

Датирањето врз основа на староста на дабовото дрво од остатоците на бродовите покажа дека дрвото доаѓа од западниот дел на Балтикот и дека дрвото за него е сечено помеѓу 1690 и 1695 година. Тулите се со исти димензии како таканаречените „фленсбург тули“ што се користеле во Данска и во данските колонии. Анализите на глината, спроведени од професорката Каре Лунд Расмусен од Универзитетот во Јужна Данска, покажаа дека потекнува од Данска.

Глинените цевки се идентификувани како обични, произведени во Холандија, кои се користеле и на данските бродови. Големината, обликот и шарите на цевките сугерираат дека се произведувале во периодот непосредно пред бродоломот на бродовите во 1710 година. Глинените цевки ретко се користеле повеќе од пет години.

Според историски извори, два дански брода за робови „Фридрикус Квартус“ и „Кристијанус Квинтус“ доживеале бродолом покрај брегот на Централна Америка во 1710 година. „Фридрикус Квартус“ бил запален, додека јажето за сидро на „Кристијанус Квинтус“ било пресечено, по што бродот бил распрснат во крајбрежните бранови. Досега не било јасно каде точно се изгубени бродовите.

Во Костарика, долго време било познато дека два брода се наоѓаат во плитките води во близина на Националниот парк Кахуита. Сепак, многу години се сметало дека се пиратски бродови. Но, кога американските поморски археолози пронашле жолти тули во еден од бродовите во 2015 година, се појавиле нови прашања за историјата на бродовите.

Жолтите тули биле произведувани во Фленсбург за употреба во Данска и данските колонии во 18 и 19 век. Во други европски земји, други видови тули и камења биле во мода при изградба на нови згради.

Инаку, Данците тргувале со робови во два наврати во текот на нивната историја. Во викиншката ера, тие продавале Европејци заробени за време на крвави походи, додека од почетокот на 18 век до 1807 година, продавале робови од Африка.

Данската тврдина Кристијансборг на територијата на денешна Гана се користела за контрола на набавката на робови и нивното испраќање, главно во Северна Америка. Се проценува дека во тој период повеќе од 100.000 робови биле транспортирани во Америка, но дека половина од нив починале поради ужасните услови на бродовите.