Утрово неубава слика на Водно – несовесни граѓани направиле мини депонија, иако деновиве е актуелна темата за депониите низ Скопје и загадениот воздух од пожарите, кои го завиткаа градот во магла.

Ветрот утрово го прочисти воздухот во Скопје. Времето е посвежо и ветровито, па конечно се дише, но сепак лошите навики и некултурата останаа.

Фотографиите утрово до „Слободен печат“ ги испрати редовен читател.

Граѓани со денови протестираат на раскрсницата кај мостот „Близнаци“, помеѓу општините Аеродром и Гази Баба, поради загадувањето на воздухот од пожарите на „Вардариште“ и „Дрисла“.

Премиерот Христијан Мицкоски вчера најави строги казни за подметнување пожар, но и за несовесни граѓани кои ќе фрлаат ѓубре на несоодветно место.

Министерот за животна средина и просторно планирање, Изет Меџити, испрати препорака до општините да спроведат детални контроли и идентификација на сите диви депонии и нерегистрирани локации за отпад, како и да изготват планови за нивно систематско отстранување.