Ново археолошко откритие во Кувајт го привлече вниманието на експертите и јавноста, глинена фигура од 6 милениум п.н.е. откриена е на местото Бахра 1. Оваа фигура, која наликува на модерен приказ на вонземјанин, ја отвора вратата за нови сознанија за општеството на Убаид и нивното влијание врз регионот на Арапскиот Залив, пишува „Лајв саенс“ (Live Science).

Фигурината е пронајдена за време на овогодинашните ископувања на локалитетот Бахра 1, праисториска населба на северот на Кувајт, каде што тим археолози од Кувајт и Полска истражува од 2009 година. Бахра 1 е една од најстарите населби на Арапскиот Полуостров, која била населена од 5500 до 4900 година п.н.е.

Според Агњешка Шимчак, водач на експедицијата и археолог од полскиот центар за медитеранска археологија на Универзитетот во Варшава, ова откритие било сосема неочекувано.

„Откривањето на фигурата беше целосно изненадување за целиот тим, бидејќи тоа е прво вакво откритие, не само меѓу повеќе од 1.500 мали артефакти ископани на локацијата Бахра 1, туку и во целиот регион на Арапскиот Залив“, рекла Шимчак.

Фигурината е изработена од месопотамиска глина, што дополнително укажува на културната размена меѓу Месопотамија и Арапскиот Полуостров во тој период.

Малата глава на фигурата има коси очи, рамен нос и издолжен череп, карактеристики кои често се поврзуваат со фигурините од Убаид пронајдени порано во Месопотамија. Фигурината е пронајдена во простор кој се користел за секојдневни активности, како што се работа или престој на луѓе, а не на место со посебна намена, како што се гробници или светилишта.

Според Аурелиус Демс, археолог од Универзитетот Гент во Белгија, кој не бил дел од истражувањето, откритието има потенцијал да ги разјасни прашањата поврзани со ритуалните и социјалните практики на Убајданците, како и односот помеѓу праисторискиот регион на Заливот и Месопотамија.

Убаидите биле праисториска култура од Месопотамија, позната по својата керамика и уметност. Во текот на 6-тиот милениум п.н.е., тие се сретнале со неолитските општества во Арапскиот Залив, создавајќи уникатен праисториски центар на културна размена. Според Шимчак, Бахра 1 била едно од клучните места за таа размена.

Еден од најинтересните аспекти на културата на Убаид беше практиката на вештачка деформација на черепот, каде што крпа или штици се обвиткувале околу главите на бебињата со цел да се постигне издолжена форма на черепот. Оваа постапка, забележана и на скелетни остатоци од Месопотамија, веројатно имала симболично значење, што укажува на социјален статус, припадност на група или естетски идеал од тоа време.

Фигурините со издолжени глави, како онаа од Бахра 1, можеби прикажувале луѓе со оваа форма на череп. Оваа практика го достигна својот врв во текот на 5 милениум п.н.е.