Дали знаевте дека Норвешка е вториот најголем потрошувач на кафе во Европа? Можеби омилениот пијалак им помага да ги пребродат острите зими, но факт е дека Норвежаните пијат кафе секој ден – во просек дури четири шолји.

И затоа е пожелно да имате омилено кафуле, во кое ќе се чувствувате како дома, а токму тоа го добија жителите на Осло пред три години. Кафулето се вика „Киоск!“ и се гордее со титулата на едно од најмалите кафулиња во норвешката престолнина. Внатрешниот простор на овој локал може да прими само четири лица, но затоа има голема градина со маси и столови каде во текот на зимата ќе ве пречекаат топли, волнени ќебиња.

Кафулето „Киоск!“ има и четворица вработени – некои од нив се многу искусни баристи, но сите, без разлика на претходното работно искуство, имаат платена обука. Ова прекрасно место за кафе е апсолутен хит на Инстаграм, а доказ за тоа е зголемениот број на следбеници од целиот свет.

„Сè започна во 2021 година кога во близина на старата гаража/автомеханичар најдовме бензинска пумпа од 1935 година. Планиравме таму да отвориме сервис за велосипеди наречен Vhee!, но основачите сакаа да имаат и убав кафе бар во рамките на старата бензинска пумпа. Затоа, во потрага по луѓе кои знаат да водат кафуле, ме контактираа на Твитер. Бидејќи се занимавам со кафе веќе 10 години, се согласив да им помогнам. Пронајдов најдобри машини за кафе (испорачани од rRebel од Осло), најдоброто кафе и ги собрав најдобрите луѓе што ги познавав. Киоск! брзо се покажа како многу успешен проект, на кој многу му помогна големото внимание од печатот и социјалните мрежи“, вели Свере Колбјорнсен, менаџер на кафулето.

Кафе од врвни места за пржење и продажба на цвеќе

Покрај кафе, на своите клиенти им нудат и свежи печива што им ги доставуваат во петок, често организираат и продаваат цвеќиња, а имаат и сопствена стока – чанти, маици и капи со своето лого Пегаз Пеги (крилест коњ). Имено, во триесеттите години на минатиот век, тоа беше истото лого на споменатата бензинска пумпа на „Мобил оил“ (Mobile Oil).

„Ние сме мала продавница, со мали приходи и мали трошоци, која се труди да се фокусира на што повеќе добри работи, тоа е всушност нашата филозофија. Но, бидејќи сме независни, можеме да избереме што навистина сакаме. Така, на нашите гости им нудиме кафе од различни мали пржионици кои работат низ Норвешка – Jaca, Langøra и Kaffi се само неколку од нив“, истакнува Свере.

„Киоск!“ денес е делумно во сопственост на 65 акционери, од кои огромното мнозинство се тесно поврзани со областа Галгеберг каде се наоѓа ова кафуле.

Сопствениците се поврзале и ги здружиле силите во есента 2021 година. Тогаш била лансирана кампања за групно финансирање, што резултирало со успешен бизнис.

„Една од нашите главни цели беше да припаѓаме на соседството. Не сакавме да доаѓаат хипстери од целиот град кои само сакаат да проверат ново место кое ќе им биде интересно додека не изгубат интерес. Сакавме да го вклучиме соседството во бизнисот и успеавме. Ни доаѓаат кул деца од целиот град, но и луѓе од странство“, рекол Свере.

„Станавме хит дестинација. Знаејќи дека Осло е еден од најдобрите градови за кафе во светот, тоа е вистински комплимент. Гостите ни велат дека е многу убаво да се види вака независно место и се воодушевени од начинот на кој ја реновиравме старата бензинска пумпа“, открива менаџерот.

Шармантен норвешки дизајн

Шармантниот „Киоск!“ може да се пофали и со одличен норвешки дизајн. Мари Канстад Јонсен, илустраторка и авторка на книги за деца, го стилизирала нивното лого и направила мурал и шарена греда пред кафулето. Надворешниот мебел, претходно користен во друг проект и најверојатно ќе трае уште сто години, го потпишува „Вестре“ (Vestre), водечки скандинавски производител на одржлив мебел за урбани и надворешни средини. Внатрешните клупи и столчиња ги изработил локалниот столар Сјур Соргард, а шанкот е направен од океанска пластика и е производ на „Норвешка траш“ (Norvegian Trash), компанија за преработка на пластика, пишува „Путникуфер.хр“.

Имале и крадци, но немале што да украдат

Иако работата им цвета, „Киоск!“ имал, за жал, и неколку кражби.

– Оваа зима беше студена, на многу начини. Норвешката економија доживеа пад кога централната банка ги зголеми каматните стапки на рекорд. Во ноември сите едноставно престанаа да купуваат кафе. Зимата е секогаш предизвикувачка за „летен бизнис“ како што е нашиот, а непосредно пред Божиќ бевме потресени од две кражби, кои се случија речиси во иста недела – велат тие.

„Немаме ништо вредно, освен стар Ајпад кој веднаш беше украден. Вториот пат немаше што да се украде бидејќи сè уште ништо немавме купено.“