Концертна промоција на новиот албум „Егрегор“, создаден во соработка меѓу Никола Стојковски („ФИН Проект“) и Тања Царовска, ќе се одржи во рамките на фестивалот „Скопско лето“ на 3 јули, во 20 часот, на една од најинспиративните концертни локации во Македонија, во Куршумли ан (Стара чаршија) во Скопје.

Како гости на концертот ќе настапат Петар Христов (саксофон и кларинет) и Горан Трајкоски – Готра, на пијано ќе настапи Билјана Петровска, бас и контрабас ќе свири Андреа Мирческа, а ќе учествува и гудачки квартет во состав: Илија Јовчев (виолина), Ева Ристеска (виолина), Ангела Винтовска (виола) и Александар Ицковски (виолончело).

Претходни албуми на „ФИН Проект“ се „Битови и Орнаменти / Во Македонија“, „Едно е Сонцето“, „Ре:Визија“, „Време. Живот. Слобода“, на кои како соработници или гости на Никола Стојковски се појавија Калина Велковска, Александар Николовски, Горан Трајковски – Готра, Васко Атанасоски, Влатко Георгиев, Ненад Стефаноски, Зарина Првасевда и други.

Десетгодишнината на групата во 2023 година беше заокружена со албум за кој на музиката на „ФИН Проект“ оркестарски аранжмани подготвија Јован Јовановски, Сенад Усеин и Билјана Петровска, а автор и продуцент на сите албуми е Никола Стојковски.

(Текстот е објавен во „Културен печат“ број 287, во печатеното издание на весникот „Слободен печат“ на 28-29.6.2025)