Кинотеката на Македонија за март подготви богат и разновиден филмски репертоар исполнет со јубилејни проекции, премиери и посвети на значајни автори и филмски остварувања.

Програмата во Кинотеката во Скопје ќе им овозможи на филмските љубители да уживаат во ремек-дела од светската и македонската кинематографија, низ искуство што комбинира историја, емоции и незаборавни кадри. Програмата ја слави моќта на филмот како средство за раскажување приказни, за премостување на времето и за оддавање почит на оние што ја обликуваа седмата уметност.

Во сегментот „Јубилејни проекции на култни филмови“ се одбележуваат 40 години од премиерата на „Враќање во иднината“ (1985, реж. Роберт Земекис), кој ја дефинираше поп-културата и инспирираше многу генерации, како и 25 години од премиерата на „Реквием за еден сон“ (2000, реж. Дарен Аронофски), потресна драма и едно од највознемирувачките истражувања на човечката зависност и пропаст.

Во чест на неодамна починатиот мајстор на филмската илузија, Дејвид Линч, проекција ќе има „Приказната за Стрејт“ (1999), приказна која зрачи со топлина и човечност, различна од неговите вообичаени надреални светови. Специјална програма е посветена и на македонскиот уметник Коле Манев, чиј придонес во културата ќе остане незаборавен.

Јубилејни проекции на историски епоси ќе имаат „Јазол“ (1985, реж. Кирил Ценевски), со што се одбележуваат 40 години од ова ремек-дело на македонската кинематографија, додека со „Гладијатор“ (2000, реж. Ридли Скот) се одбележуваат 25 години од премиерата на епскиот филм, кој го освои светот со својата грандиозна приказна за чест, одмазда и сила. Премиерна проекција ќе има и „Гладијатор 2“ (2024, реж. Ридли Скот).

Специјални проекции ќе имаат култните филмови „Црна Марија“ (1986), југословенски филм со Милан Младеновиќ од ЕКВ во една од главните улоги, кој останува значајно сведоштво за времето и духот на тогашната сцена, и „И Бог ја создаде жената“ (1956, реж. Роже Вадим), антологиска драма со Брижит Бардо, во чест на француската кинематографија и нејзиниот бунтовен дух, филм што го редефинираше женскиот лик во европскиот филм.

Сто години од раѓањето на Пол Њумен ќе бидат одбележани со филмот „Долго, топло лето“ (1958, реж. Мартин Рит), каде легендарниот Пол Њумен игра заедно со Орсон Велс. Совршен приказ на страст, амбиција и судир на генерации, со Њумен во една од неговите најхаризматични улоги.

Како и секоја година, од 21 до 28 март во Кинотеката ќе се одржи циклусот „Денови на Франкофонијата“ со избор на француски и франкофонски филмови, кои ќе ја донесат магијата на европскиот авторски филм. Од класици до современи бисери, овој циклус ќе биде вистински подарок за љубителите на француската култура.