Вчера интензивно се работеше со локалните епидемиолози во Кумановската болница, се правеа интервјуа на сите лица кои биле во контакт со починатата пациентка, истакна на денешната прес-конференција, министерот за здравство Венко Филипче.

-Има дијагностицирани пет пациенти, од кои тројца се медицински лица, двајца доктори и една медицинска сестра. Детално е испитувано и семејството, се чекаат резултати од 63 лица, како медицински персонал во болницата, така и членови на семејството, па ќе се прави план за работа во болницата- рече Филипче.

На владина седница, рече Филипче, донесовме повеќе мерки кои се однесуваат на Куманово.

-Меѓуградскиот превоз ќе го укинеме целосно, помеѓу Куманово и другите градови, исто така и градскиот превоз и железничкиот патнички јавен превоз. Се даваат препорака за затворање на сите продавници и донесовме одлука со која се задолжува ИЈЗ за поинтензивна работа на цел кумановски регион- рече Филипче.

Со овие мерки, потенцираше Филипче, има сериозна шанса да се спречи патот на ширење на вирусот.