Македонскиот репрезентативец Филип Савовски во следната сезона ќе го носи дресот на грчкиот шампион Панатинаикос.

Средниот блокер и клубот се договорија на едногодишна соработка.

Со овој трансфер интернационалната кариера на 23-годишниот одбојкар добива нова димензија.

– Претставува посебно задоволство, но и најголем предизвик досега во кариерата потписот со Панатинаикос. Клуб со голема традиција, актуелен шампион на Грција и не се сомневам дека целите и во следната сезона ќе бидат високи. Професионално ќе се искачам скалило повисоко со оглед на тоа дека екипата ќе настапува во Лигата на шампионите, што истовремено ќе претставува и ново искуство и можност за напредување и докажување. Се договоривме на едногодишна соработка и се надевам дека ќе имам успешна и пред се здрава сезона – вели Савовски.

Савовски својата кариера ја започна во Весна Пробиштип, потоа преминува во Струмица 47&72 со кој ја освојува двојната круна во македонското првенство, а првиот интернационален чекор го прави во српските клубови Војводина и Нови Сад.