Светската автомобилистичка федерација (ФИА) ја поништи одлуката на организаторите на трката за Големата награда на Саудиска Арабија и објави дека шпанскиот возач на Астон Мартин Фернандо Алонсо официјално го освои третото место во Џеда на втората трка сезонава во шампионатот во Формула 1.

Алонсо синоќа го освои третото место на Големата награда на Саудиска Арабија, но по завршувањето на трката, судиската комисија одлучи да го санкционира Шпанецот со додавање 10 секунди на конечното време, бидејќи процениле дека возачот на Астон Мартин по правилата не ја отслужил казната од пет секунди пред првиот „бокс“. Третото место му беше доделено на британскиот возач на Мерцедес Џорџ Расел, а Алонсо падна на четвртата позиција, бидејќи според мислењето на судиите направил прекршок.

Според правилата на Ф1, натпреварувачот е санкциониран со пет секунди, а додека не истече тоа време, механичарите во пит стопот не смеат да го допираат болидот. Во образложението на одлуката за дополнителната казна за Алонсо, судиите изјавија дека кранот го допрел болидот пред да поминат пет секунди.

Но, тимот на Астон Мартин поднесе жалба, а по прегледувањето на снимката, претставниците на ФИА му го доделија на Алонсо третото место на Големата награда на Саудиска Арабија и така Шпанецот по 100 пат во кариерата заврши на подиумот.

Првото место на трката за Големата награда на Саудиска Арабија го освои мексиканскиот возач на Ред Бул, Серхио Перес, додека неговиот тимски колега и актуелен светски шампион во Ф1, Холанѓанецот Макс Верстапен беше втор.