На Еурофарм Пелистер му беше доволен и бод во натпреварот од последното 10 коло во ЕХФ Европската лига против Мотор Запорожје за пласман во осминафиналето, но не ја оствари целта.

Пред своите навивачи во салата „Боро Чурлевски“ – Битола играчите на тренерот Ларс Валтер загубија со 25:27 од украинската екипа.

Најефикасен во редовите на Еурофарм Пелистер беше Танкоски со девет погодоци, а четири запиша Василев.

На спротивната страна седум погодоци забележа Турченко, а пет имаше Хориха.

Во останатите два меча од рундата, Фуксе Берлин славеше кај Агуаш Санташ со 23:29, додека Бидасоа Ирун со 29:26 на домашен терен го совлада Скандерборг Архус.

На конечната табела Фуксе Берлин го освои убедливо првото место со 20 максимални бодови, пред Скандерборг Архус со 14, Бидасоа Ирун на третата позиција со девет, а на четвртата позиција Мотор Запорожје со седум бодови. Сезоната во Европската лига заврши за Еурофарм Пелистер кој освои шест бодови и Агуаш Санташ (четири бодови).