Пред полните трибини во салата „Боро Чурлевски“ во Битола ракометарите на Еурофарм Пелистер со 33:20 триумфираа над Алкалоид во 19 коло од македонската Суперлига.

После првото полувреме актуелниот првак на нашата земја Еурофарм Пелистер имаше пет голови позитива (16:11).

Веќе на стартот од мечот домаќините стекнаа убава предност од 5:1, па константно одржуваа водство од четири-пет голови разлика до паузата.

Ништо не се промени резултатски на паркетот во вториот дел, доминираше домашната екипа која само го зголемуваше водството кое нешто подоцна стана за прв пат и двоцифрено (24:14), а највисоката позитива на мечот се случи во самиот финиш кога битолскиот тим дојде и до „плус 13“.

Кузмановски со 11 голови беше најефикасен во редовите на Еурофарм Пелистер, три повеќе од Радивојевиќ.

На спротивната страна за Алкалоид доминираше Серафимов со осум погодоци, а три запиша Ѓорѓиев.

На табелата Еурофарм Пелистер води со 34 бодови, колку што имаат и Алкалоид и Вардар на второто, односно третото место.

Во следното коло на 1 март Еурофарм Пелистер ќе му гостува на Радовиш, а истиот ден Алкалоид ќе го пречека Тинекс Пролет.