Овие слатки перничиња полнети со различни филови, се еден од симболите на мексиканската кујна и незаменлива закуска, за чија подготовка не треба посебен датум или важна пригода.

Слатки, солени, со разни сосови, зачини и сервирани по ваш избор – емпанадите се прават од тесто, а се полнат со разни филови. Иако ја прославија мексиканската кујна, всушност тие се шпански специјалитет уште од средниот век.

Традиционалното тесто се подготвува од брашно, путер или маст и малку сол, а рабовите на перничињата кои по печењето ќе станат опасно крцкави, се цврсто затворени и по желба украсени со разни шари.

Состојките за полнење варираат по регион – во крајбрежните делови на земјата можете да најдете и емпанади со морска храна,  додека во внатрешноста се претпочита пилешко или говедско месо. Иако тие се особено популарно јадење во кое ужива целото семејство собрано околу масата за време на празниците или кога станува збор за прослави каде маријачито е задолжително, во Мексико никој нема да протестира ако секој ден се служат емпанади на масата.

СОСТОЈКИ:

ЗА ТЕСТО:
• 350 г обично брашно
• ½ лажичка сол
• лажичка шеќер
• 180 мл вода
• 100 г путер

ЗА ПОЛНЕЊЕ:
• 2 лажици растително масло
• 2 помали кромидчиња
• 3 чешниња лук
• 450 г варени и сечкани пилешки гради
• една лажичка мелен црвен пипер
• една лажичка мелен ким
• една лажичка сол
• ½ лажичка свежо мелен црн пипер
• 100 мл вода
• јајце

ПОДГОТОВКА:

1. За да го подготвите тестото, просејте го брашното во длабок сад и додадете сол и шеќер. Растопете го путерот и почекајте малку да се излади, па додајте го во смесата. Постепено додавајте вода и месете со рака додека не добиете мазно тесто. Завиткајте го тестото во фолија и ставете го во фрижидер половина час.

2. Исечете го кромидот и додадете растително масло во тавата и, повремено мешајќи, пропржете го кромидот 15 до 20 минути на средна температура додека не добие златно-кафеава боја и малку да се карамелизира. Додадете ситно сечкан лук во пржениот кромид и пропржете сè заедно уште околу една минута додека нежно мешате.

3. Потоа во тавата додајте го претходно сварено и исечкано пилешко, посолете и зачинете сè заедно со црвен пипер, ким и црн пипер. Откако ќе ја додадете водата, оставете ја смесата да зоврие и потоа варете се додека не испари водата, приближно 20 до 30 минути. Откако смесата за полнење емпанада е готова, тргнете ја на страна и почекајте да се излади.

4. На набрашнета површина развлечете го тестото на дебелина од околу половина сантиметар. Од развлеченото тесто исечете кругови со дијаметар од 10 до 15 сантиметри, во зависност од тоа дали сакате помали или поголеми емпанади. Во центарот на секој круг ставете околу 2 лажици од изладената пилешка смеса. Рабовите на тестото лесно премачкајте ги со изматено јајце, преклопете го тестото преку филот и притиснете ги рабовите за да го затворите перничето кое изгледа како мала полумесечина. Притиснете ги рабовите на полумесечините со врвот на вилушката за да спречите течење на филот за време на готвењето.

5. Ставете хартија за печење на плех и загрејте ја рерната на 180 степени. На хартијата емпанадите ставете ги на растојание од околу 3 см. Премачкајте ги со изматено јајце и печете ги додека не поруменат, приближно 20 до 25 минути. Послужете ги со салса или кој било друг омилен сос и уживајте во вашата вкусна мексиканска гозба.