Истражувањата покажаа дека е најдобро миењето под млаз ладна вода, а можат да помогнат две работи што сите ги имаме во кујната.

Секојдневното консумирање овошје и зеленчук е совршена комбинација за здравјето, но треба да се внимава на една работа, а тоа е намирниците добро и темелно да се измијат пред јадење. Додека многумина се запознаени со опасностите кои консумирањето на сирово месо или риба ги претставуваат за телото, тие ги игнорираат оние што можат да потекнуваат од сировото овошје и зеленчук, пишува Си-ен-ен.

Се проценува дека секој десетти човек се разболува поради консумирање расипана храна, а 46 отсто од болестите се предизвикани токму од неизмиеното овошје и зеленчук. Повеќето од овие намирници растат на отворено и се изложени на разни инсекти и болести.

Таквите производи освен нечистотија може да содржат и бројни бактерии, габички, вируси и пестициди. Свежите производи, исто така, може да се контаминираат и во текот на пакувањето, подготовката или складирањето. Дури и производите што се одгледуваат во оранжерии може да содржат микроби и пестициди, затоа е важно да ги измиете пред консумирање, а еве како најдобро да го направите тоа.

Прво, потребно е темелно да ги измиете рацете за да не се префрлат бактериите и микробите од нив на нимирниците. Наједноставниот и најбезбедниот начин за миење на овошјето и зеленчукот е рачно под млаз ладна вода.

Намирниците треба да се тријат со рацете за да се отстрани нечистотијата, пестицидите и некои површински бактерии. Ако намирниците се натопат во вода, за тоа треба да се користи чист сад, а не лавабото, бидејќи и тој може да биде полн со бактерии.

Производите никогаш не смеат да се мијат со помош на детергент и избелувач, бидејќи лушпата (кората) на некои овошја и зеленчуци е порозна и може да ги впие овие хемикалии. Ова не само што може да го промени нивниот вкус и текстура, туку може да ги направи и опасни за јадење.

Оцет и сода бикарбона

Оцетот и сода бикарбоната може да се користат за миење свежи производи, бидејќи го намалуваат бројот на бактерии и пестициди. Најчесто за ова се користи јаболков или алкохолен оцет, а треба да се додаде половина шолја на шолја вода. Намирниците треба да се натопат и повремено да се мешаат две до три минути, а потоа да се исплакнат со свежа ладна вода најмалку една минута.

Меѓутоа, еден недостаток кај употребата на оцетот е тоа што оцетната киселина што ја содржи може да ги промени вкусот и текстурата, особено на меките овошја, ако се потопени подолго од три минути и ако не се измијат темелно.

Што се однесува до сода бикарбоната, се покажало дека околу 0,84 грама сода бикарбона на 100 милилитри вода го спречува растот на бактериите на свежите производи. Исто така, се покажало дека 15-минутното натопување со сода бикарбона ги отстранува речиси сите траги од пестициди.

Меѓутоа, всушност, потребна ви е само една лажичка сода бикарбона по шолја ладна вода за да ги измиете производите. Ова сепак ќе ги отстрани микробите и пестицидите без да го промени вкусот на производот. Намирниците треба да се натопат 15 минути во ладна вода со повремено мешање.

Бидејќи сода бикарбоната е алкална, натопувањето повеќе од 15 минути и нетемелното миење може да ја уништи кожата на чувствителното овошје и зеленчук, што влијае на нивната текстура и вкус.

Но, спроведени се истражувања кои покажаа дека миењето на јаболката само со обична вода е речиси исто толку ефикасно, но едно неодамнешно истражување за јаболката покажа дека пестицидите продираат подлабоко од кожата.

Затоа, покрај миењето, авторите сугерираат дека лупењето на јаболката пред јадење може дополнително да ги намали сите траги од пестициди. Еден недостаток на лупењето е тоа што ги отстранува и бројните хранливи материи што ги содржи кората, а и многу овошја и зеленчуци не можат да се лупат.

Како да се мие овошјето и зеленчукот

Производство со тврда лушпа, како што е тиквите, или цврста луѓпа, како што се компирите, слатките компири и коренестиот зеленчук, може да се истријат со четка додека не изгледаат чисти. Доматите може да се исплакнат само под млаз вода 30 секунди.

За миење на зелениот лиснат зеленчук, како зелена салата, брокула, карфиол, кељ или зелка, се препорачува тоа да се одвои на листови, кои потоа се мијат поединечно со млаз вода околу една минута. Бидејќи зелената салата обично се јаде неготвена, побезбедно е да се отфрлат сите оштетени надворешни листови, бидејќи тие најверојатно се контаминирани со бактерии.

Што се однесува до овошјето, водата повторно е најдобриот начин за миење на загадувачите. За коскесто овошје, јаболка и краставици, се препорачува да се исплакнат во ладна вода една минута.

Високата содржина на вода во црешите, грозјето, јагодите и другите бобинки ги прави особено расипливи. Натопувањето на бобинките ќе го зголеми растот на сите присутни микроби и ќе им го намали рокот на траење. Како такви, најдобро е неизмиени да се чуваат во фрижидер, а да се измијат непосредно пред јадење.