Овој непријатен феномен се случува кога личноста создава лажно чувство на сигурност во врската, а потоа исчезнува без трага – како да се претвора во дух. Овој феномен се нарекува и „гоустинг“ (ghosting).

Сите кои активно се вклучени во започнување на нови врски се свесни за феноменот на игнорирање или „гоустинг“ . Никој не сака да стане жртва на „гоустинг“, но според последните истражувања, постои валидна причина зошто тоа ви се случува.

Имено, овој термин е еден од најчестите во светот на започнување на нови врски во 2024 година. „Гоустинг“ се случува кога некоја личност создава лажно чувство на сигурност во врската, а потоа исчезнува без трага – претворајќи се во „дух“.

Според една студија објавена во списанието „Journal of Experimental Psychology: General“, тоа е всушност кукавички обид да се избегне повреда на другите, без да се разбере болката што може да ја предизвика тој потег.

Авторот на студијата, Јеџин Парк, самиот бил жртва на „гоустинг“ и го искористил сопственото искуство за да го истражи овој феномен.

– „Гоустингот“ стана уште полош поради пандемијата КОВИД-19, кога комуникациите претежно се движеа преку интернет, што го олесни создавањето на овој феномен. Кога коавторот Надав Клајн ме праша дали сум заинтересиран да го проучувам овој феномен со него, бев возбуден да го истражам од психолошка перспектива – изјави тој.

Парк изјави за „PsyPost“ дека резултатите од студијата може да се сумираат во зборовите на експертот Адам Грант кој ја коментираше нивната работа.

– „Гоустингот“ не е секогаш резултат на негрижа, често е погрешен обид да се избегне повреда на другите. Многумина престануваат да комуницираат и се повлекуваат за да ги заштитат другите од болка и не сфаќаат дека игнорирањето е обично полошо од отфрлањето. Искреноста боли за кратко, но тишината остава отворена рана – вели Грант, пишува „Мирор“.