Велимир Јовановски од скопското село Мирковци добил сметка за струја за период од 7 ноември до 4 декември 2021 година од 58.661 денар. Но, како што вели тој, јасно му било дека таа се однесува за 11 месеци, затоа што претходно добивал сметки само за улично осветлување. Сепак, оваа сметка, како што раскажува Јовановски, отворила многу проблеми со кои се соочуваат граѓаните.

– Порано секој месец, иако сме село, доаѓаше вработен од ЕВН да ги чита струјомерите. Сега доаѓа еднаш годишно, а како што ми објаснија оттаму, тоа е нивно право според регулативата, што воопшто не е во ред. Јас сум возрасен човек, имам 82 години, струјомерот беше високо поставен во куќата и не бев во можност постојано да го отчитувам и да им праќам информации. Затоа, кога ја добив сметката, реагирав до Регулаторната комисија за енергетика за три работи. Како прво, со оглед на висината на сметката, и со оглед на тоа што се грееме главно на дрва, се сомневам во исправноста на струјомерот кој е од 1972 година и побарав тој да се смени, како второ имав забелешки во однос на тарифирањето и важечките цени што треба да се применат како што биле во 2021 година и како трето побарав сметката да ја платам на 11 рати – вели Јовановски.

Исход од неговите барања е сменет струјомер, коригирана сметка од 58.661 денар на 56.683 денари и спогодба за плаќање на долгот на 11 рати. Но, со спогодбата стигнало и непријатно изненадување.

– Отидов во просториите на ЕВН и ја потпишав спогодбата, но, за жал, не ги носев вистинските очила. Кога дојдов дома и кога подобро погледнав, гледам дека спогодбата се однесува на 59.121 денар, односно дека е повисока за 2.483 денари од наведената фактура од 56.683 денари, и тоа без никакво конкретно објаснување. Имено, за износот од 59.121 денари е напишано општо дека тоа е долг по фактурата, комунална такса, тужени побарувања и трошоци – вели Јовановски.

Јовановски вели дека досега немал никакво тужено побарување и е изненаден од каде е овој износ, за што напишал приговор до ЕВН, но му било одговорено дека спогодбата е веќе потпишана.

Извршителот Гордан Станковиќ во изјава за „Слободен печат“ вели дека во правото нема непрочитан договор и дека ако некој  стави потпис и на долг од пред децении, склучил нов договор со правно дејство.

– Долгувањето никогаш не згаснува. Застарувањето е временски рок за правна заштита, по тој рок имаме гола облигација. Во облигационото право има застарување, во стварното – нема. Застарувањето за режиски трошоци е по една година. Тоа значи ако сметката за струја од мај 2021 година не сте ја платиле до мај 2022 година, таа е застарена. Но, ако во тој рок од една година е поведена постапка, од тој ден, рок за извршување е 10 години. Од друга страна, ако стара сметка и од пред 70 години некој понуди за плаќање и ако таа се стави во спогодба, тоа е веќе нов договор и ако не се испочитува, странката може да биде тужена. Ако таа, пак, самоиницијативно, по грешка плати некоја многу стара сметка, тогаш тие пари се добиени без правна основа и ако тужи странката, важи застареноста на сметката – вели Станковиќ.