„Традиционалниот“ учесник на Ф4 турнирот во СЕХА лигата, Мешков Брест ја има фаворитската улога денеска во Битола (20.15 часот) против Е. Пелистер во првиот натпревар од четвртфиналето.

Играчите на битолскиот клуб предводени од Жељко Бабиќ го бркаат своето прво учество на „Фајнал-фор“ завршниците во регионалното натпреварување.

Од редовите на Е. Пелистер се свесни за големиот предизвик кој ги очекува, но веруваат дека ова не е „невозможна мисија“.

Македонскиот вицешампион потпиша со неколку искусни ракометари, нови голмани се Унгарецот Мартон Секељи и младиот талентиран Марко Кизиќ, потоа десното хрватско крило Јосип Божиќ Павлетиќ, и српскиот лев бек Немања Обрадовиќ.

Е. Пелистер не доби „зелено светло“ за присуство на публика за мечот против Мешков

Тимот чека 17 години за домашна титула и оваа сезона има сериозни амбиции шампионската титула конечно дојде повторно во Битола.

– Е. Пелистер е сигурно тежок ривал против кој може да се игра и како што сите знаеме, изненадувања секогаш може да се случат. Имаа и активен преоден рок, но од она што го видовме тие имаат навистина добар тим. Знаат што прават и сигурно не зборуваме за истиот Е. Пелистер од пред две или три сезони. Шансите во ова четвртфинале се 50:50 – вели играчот на Мешков Брест и екс член на Вардар, Сташ Скубе.