Поранешниот британски премиер Борис Џонсон ќе има шанса да го одбрани своето справување со пандемијата во два дена испрашување во истрагата за ковид. Се очекува Џонсон да се извини и да признае дека неговата влада направила грешки за време на пандемијата.

Но, извори блиски до Џонсон изјавија за Би-Би-Си дека тој ќе тврди дека направил неколку потези што спасиле животи. Истрагата наиде на тешки критики на сметка на Џонсон од поранешни колеги кои работеа со него кога се појави пандемијата.

Неговиот поранешен директор за комуникации, Ли Кејн, рече дека пандемијата е „погрешна криза“ за „сетот на вештини“ на Џонсон, опишувајќи го како мрзелив поради честото доцнење во донесувањето на клучните одлуки. Поранешниот главен научен советник, Сер Патрик Валанс, рече дека Џонсон бил „збунет“ од научните податоци.

Но, постојат и личности во британската политика кои го бранеа поранешниот премиер и неговиот стил на владеење. Министерот Мајкл Гоув ги оспори тврдењата дека Џонсон е „неспособен да донесува одлуки“ за локдаунот. Тој вели дека Џонсон претпочита „гладијаторско одлучување“ и сака да види спротивставените аргументи „да се вежбаат пред него“.

Поранешниот министер за здравство Мет Хенкок рече дека поранешниот советник на Џонсон, Доминик Камингс се обидувал да ја грабне власта од Џонсон и создал „токсична“ култура во срцето на владата што го поткопа нејзиниот одговор на пандемијата. Самиот Џонсон сега ќе има можност да ја стави својата верзија на настаните на евиденција во истрагата.

Портпаролот на Џонсон рече дека со нетрпение очекува да и помогне на истрагата во нејзината важна работа.