Џенифер Лопез би можела индиректно да биде вклучена во претстојниот судски процес против Шон Диди Комбс, кој беше уапсен во септември минатата година.

Диди моментално се соочува со сериозни обвиненија кои вклучуваат рекетирање, трговија со луѓе за сексуална експлоатација и прекршоци поврзани со проституција.

Имено, обвинителите сакаат да вклучат докази од пукањето во 1999 година што се случило во ноќен клуб, во кој учесник бил Комбс. Џенифер Лопез во тој момент била присутна на местото на настанот. По инцидентот во кој се повредени три лица, Лопез и Диди го напуштиле клубот, а полицијата ги запрела додека возеле низ Менхетен. Во нивното возило потоа бил пронајден украден пиштол.

И двајцата тогаш беа уапсени, но Лопез не била обвинета за никакво кривично дело, додека обвиненијата против Комбс подоцна беа отфрлени.

Адвокатите на Диди бараат инцидентот од 1999 година да биде исфрлен од судскиот случај, пишува „Дејли мејл“.

Тие исто така се обидуваат да спречат видео од 2016 година на кое се прикажува физички напад врз неговата поранешна девојка Каси Вентура да биде искористена како доказ. Тоа видео беше објавено во мај 2024 година, а Комбс по објавувањето рече дека ја презема целосната одговорност. Набргу потоа бил уапсен.

Адвокатите тврдат дека никој не може да ја потврди автентичноста на видеото, како и дека снимката е целосно неточна, изменета, манипулирана, забрзана и монтирана. Во одбраната беше и форензичарот Конор Мекорт, кој под заклетва изјави дека видеото е значително забрзано и содржело големо количество на изобличување, со неможност да се исклучи решението дека материјалот е монтиран.

Воведувањето на настаните од 1999 година како дел од доказите може да значи дека Џенифер Лопез повторно ќе се најде во центарот на медиумското внимание, иако не се споменува како осомничена или како сведок.