Претседателот на Здружението на јавните обвинители, Елвин Вели, кој изјави дека кога ќерките и синовите на судиите ќе ги наследат своите родители во фелата, тоа секаде било убава традиција, а само кај нас е непотизам, е син на поранешниот судија Ведат Вели, кој беше претседател на Апелацискиот суд, но и член на Судскиот совет, пишува „Фокус“.

Синот Елвин бил избран за јавен обвинител во Вишото јавно обвинителство во 2011-тата, истата година со Миле Арсениевски кој беше во скопското обвинителство, а е син на поранешната претседателка на Апелацискиот суд, Љупка Арсениевска. Во свечената изјава пред Советот на јавни обвинители, Арсениевски рекол дека пресудна за оваа функција била фамилијарната традиција. Тој лани поднесе оставка, а Советот му ја прифати, откако претходно беше санкциониран бидејќи одолговлекувал предмет и не доаѓал на закажаните судски рочишта. И тој и Ведат Вели, а индиректно и неговиот син Елвин, се дел од разговорите објавени во „бомбите“ на тогаш опозициската СДСМ, пишува „Фокус“.

Ведат Вели во „бомбите“ се споменува во снимен разговор меѓу тогашниот министер за правда, Блерим Беџети и тогашниот вицепремиер Муса Џафери, кои разговараат за изборот на обвинители и се согласуваат дека треба да се избере синот на Вели.

Според забележаното од „бомбите“ во медиумските архиви, Беџети вели дека „му должел“ на Вели постариот.

„Чувствувам дека имам долг кон него. Ме поддржал двапати“, вели Беџети.

„Аха… И он сака да биде обвинител? (н.з. синот на Вели Ведат)“, прашува Џафери.

„Да, да“, вели поранешниот министер за правда.

Синот на Арсениевска поднесе оставка, но Вели сѐ уште е виш јавен обвинител и лани бил избран за претседател на Здружението на јавни обвинители.

Неговата изјава во врска со „убавата традиција“ наспроти непотизмот, дадена во време кога постојано се појавуваат наводи за злоупотреби во судството поврзани токму со непотизмот и семејните врски, предизвика многу реакции во јавноста. Вели гостуваше во емисијата „Детектор“, откако имаше реакции околу Академијата за судии и јавни обвинители, во која завршија синови, ќерки, сопруги, снаи… на актуелни и поранешни судии и јавни обвинители, како и на политичари.

„Кога синовите и ќерките на судиите и обвинителите ќе ги наследат своите родители, секаде тоа е убава традиција, а кај нас е непотизам“, рече Вели.

-Јас сум дете на судија и тоа сум го почувствувал на своја кожа. Реално повеќе проблеми сум имал во работата поради тоа отколку придобивки. Секогаш се било со доза на резерва, да не речат заради ова, да не речат заради тоа. Јас сум имал прилика да работам и во суд и како самостоен адвокат и сега како обвинител, сум ги поминал сите делови и секаде било истото. Едноставно сметам дека не треба да биде проблем. Видете, нормално е следејќи го мојот родител како судија цел живот да ме привлекува правото. Тој првично беше против да бидам правник, но ме остави. И сметам дека сите треба да имаме еднакви можности до делот на аплицирање и во дел на запишување и завршување конкретно сега во Академијата како единствен начин за влегување во правосудството, додаде тој.

Скоро половина од граѓаните сметаат дека судиите треба да ни ги избираат странци