Повеќе од две илјади жители на Сарај ги пречекаа високите партиски функционери на ДУИ од „огнената група“ во преполната сала во Сарај, каде се слушнаа жестоки критики за Артан Груби и за актуелните владини функционери од партијата.

Организаторот на собирот, првиот човек на огранокот на ДУИ во Сарај, Исни Јакупи, рече дека го поканил раководството на партијата за да го изрази „незадоволството на жителите за запоставувањето и незастапеноста на Сарај на кое било ниво на извршната власт“.

Секретарот за родова еднаквост во ДУИ, Саранда Имери, рече дека од почетокот на средбите пред два месеца, бројот на граѓаните на ваквите собири само расте, а од Артан Груби сѐ уште нема отчет за недостигот на инвестиции во Полог и во Сарај. Стафаи рече дека во моментов на земјава и треба македонската опозиција да гласа за уставните измени, а не да влегуваат нови партии во владата за да го спасат Артан Груби.

Претседателот на Надзорниот совет на ДУИ и еден од најистакнатите членови на т.н. „огнена група“, Муса Џафери, рече дека членството со право прашува зошто има незадоволство во ДУИ и зошто има паралелни собири во партијата.

„И оваа иницијатива има своја генеза, која започнува пред три години кога оваа извршна власт почна да го турка ДУИ во погрешен правец. Почнаа со клевета дека сакаме да смениме 2-3 министри и да ги заземеме нивните места, а вистината е дека сакаме да ја вратиме ДУИ – силна и обединета, по штетите што ѝ ги направи Артан Груби“, рече Џафери.

Тој му порача на Груби да се откаже, бидејќи „никогаш нема да ја добие ДУИ“.

Потпретседателот на ДУИ и пратеник во Собранието, Изет Меџити, рече дека овој собир е „гласот на народот, гласот на вистината“ и токму тука сакаат да ја донесат ДУИ. Меџити му порача на Груби да не помислува дека со разрешување на некои функционери ќе ги ослабне, дарувајќи ги нивните позиции на Алијанса, бидејќи тие се моќни и без функции, веќе 20 години колку што придонесуваат во ДУИ.

-Артан Груби и другите Артанци да си поднесат оставки пред народот кој никогаш не ги гласал. Со измама стана пратеник во 2016 година, кога мнозинството гласови беа на Сарај, со измама влезе во владата во 2020 година без никаков глас од граѓаните и без одобрение на претседателството“, рече Меџити.

Тој додаде и дека Груби, освен што ја ослабува ДУИ, секојдневно го ослабува и Али Ахмети, опкружувајќи го со Мендух Тачи, Арбен Таравари и многу други. На ДУИ, рече Меџити, и требаат реформи, а реформите треба да почнат со „оставка на Артан Груби и неспособните министри“.

Организацискиот секретар на ДУИ и градоначалник на Сарај, Блерим Беџети, рече дека извршната власт не мрда со процесот на децентрализација, а тоа го отежнува „развојот на албанските општини“.