Театар Комедија ги најави премиерите на претставата „Вистината“ во режија на истакнатиот словенечки режисер и актер Владимир Јурц. „Вистината“ е комедија што поттикнува прашања кој кого лаже и е поставена по текст од Флоријан Зелер.

Дали добронамерната, бела лага може да ни ги спаси пријателството и бракот? Конечно, дали воопшто можеме да разговараме за некаква апсолутна вистина кога станува збор за љубов?

Одговорите на овие скокотливи прашања, испреплетени низ современиот, иронично-комичен, но и сурово реалистичен ракопис на наградуваниот францускиот драмски писател Флоријан Зелер ќе се бараат на сцената во Театар Комедија.

Во претставата играат две актерски екипи, има една приказна и најмалку две вистини. Во едната постава се актерите Благица Трпковска Јоковиќ, Кристина Христова Николова, Роберт Ристов и Александар Вељановски, додека во другата поставата на претставата се Тања Мицков, Ева Скендеровска, Столе Мицов и Виктор Арсов.

Флоријан Зелер е француски романсиер, драмски писател, сценарист, театарски и филмски режисер. Има напишано повеќе од десетина драми, поставени низ целиот свет, кои го прават еден од најпознатите современи драматурзи. Заснован на неговата истоимена драма, својот прв долгометражен игран филм, „Таткото“, Зелер го пишува и режира во 2020-тата година и во него играат прославените глумци Ентони Хопкинс и Оливија Колман. Во 2023-тата, Зелер е одликуван со орденот на француската Легија на Честа.

Владимир Јурц е реномиран словенечки актер и режисер, роден во Марибор, дипломира на АГРФТ во Љубљана во 1974 година. Својата кариера ја започнува во Словенско младинско гледалишче, а подоцна се афирмира и како универзитетски професор по актерска уметност. Со над 35 години искуство – од античка до современа драма, Јурц станува едно од најпрепознатливите имиња во словенечката театарска и филмска сцена. Работи со врвни режисери, добитник е на бројни награди и е чест гостин на сцените во Трст, Љубљана и пошироко.

Костимографка во претставата „Вистината“ е Маја Благович, а композитор Васко Атанасовски. Преводот е на Офелија Ковилоска. Премиерите се закажани за 8 и 9 мај 2025 година во Театар Комедија.