Двајцата пациенти кои се заразени со мајмунски сипаници се мажи, на возраст од 40 и 44 години, од Скопје и не се поврзани случаи. Според податоците што ги дале, двајцата пациенти не патувале надвор од државата.

Директорката на Институтот за јавно здравје, Марија Андоновска информираше дека едниот пациент е хоспитализиран на Инфективната клиника во Скопје. Другиот пациент сѐ уште не се пријавил на ниту една од клиниките.

Заменик-министерот за здравство, Јовица Андоновски апелираше до граѓаните дека нема потреба од паника, бидејќи се преземаат сите активности, а попладнево ќе заседава и Комисијата за заразни болести.

Мајмунските сипаници, познати и како „mpox“, се вирусна болест слична на сипаниците, која предизвикува треска, осип и воспаление на лимфните јазли. Иако обично има благ тек, кај лица со ослабен имунитет може да предизвика потешки симптоми.

Болеста главно се пренесува преку близок физички контакт, вклучително и сексуален, што доведе до таргетирани кампањи за вакцинација и зголемено следење на контактите. Сепак, мутациите на вирусот и намалувањето на имунитетот по вакцинацијата во 2022 година предизвикаа загриженост за можни нови бранови.

Светската здравствена организација (СЗО) прогласи вонредна состојба од меѓународно значење во август 2024 година, нагласувајќи ја потребата од координирани напори за контрола на ширењето на вирусот.

Епидемиологот Даниловски за мајмунските сипаници: Не се пренесуваат лесно и мал е ризикот за епидемија