Ви го претставуваме звукот на нашето време. Македонското дуо „Алембик“ една година по објавувањето на „Тие“ ја претставија својата песна „Dynamo“.

„Ова е песна за вртењето – на светот, рингишпилот, плочата и слични кружни или тркалезни нешта“, велат „Алембик“.

Покрај автентичната мелодија создадена од Ива Дамјановски на клавијатури и термин, која воедно е и вокал, Виктор Танасковски на бас гитара чиј глас се нижи низ целата песна како придружен вокал, ова ново музичко патување го заокружуваат и специјалните гости Филип Ефински на гитара и Емил Спиркоски на тапани.

Песната е чиста поезија, која ќе сакате да ја слушате одновно и одново, а истата воедно ќе се најде и на првиот албум на „Алембик“.

Видео спотот е своевидна уметност – колаж од видео записи од архивата на Македонска Радио Телевизија. Режисер и монтажер на видео спотот е Дејан Јованов.

Нека оваа песна и сите наредни вртат бесконечно во етерот!