Дрејк се подготвува да преземе правни мерки поради наводите дека е педофил. Познатиот рапер подготвува втора тужба против „Universal Music Group“ (UMG) како дистрибутер на хитот на Кендрик Ламар „Not Like Us“.

Дрејк ја обвинува издавачката куќа УМГ (UMG) дека ја дистрибуирала песната знаејќи дека лажно го обвинуваат за несоодветни односи со малолетни девојчиња. Според информациите до кои дојде „Вараети“, правниот тим на Дрејк тврди дека издавачката куќа можела да одбие да ја објави или дистрибуира песната, или да побара да се отстрани или уреди навредливиот материјал.

„УМГ избра да го направи спротивното. УМГ смисли, финансираше и потоа спроведе план да го претвори „Not Like Us“ во вирален мега-хит со намера да ја капитализира штетата направена врз Дрејк и неговиот бизнис. Тие го направија ова за да создадат потрошувачки хистерија и се разбира, да направат огромен профит. Тој план успеа, веројатно над сите очекувања на УМГ“, се вели во документот.

Дрејк, исто така, верува дека УМГ насочувала пари кон радио мрежата iHeart, со цел да ги промовира „Not Like Us“ на радио станиците. Издавачката куќа ги отфрли тие обвинувања.

„Тврдењето дека УМГ би направила сѐ за да му наштети на кој било од своите изведувачи е навредливо и лажно“, се вели во меморандумот.

„Ние ги применуваме највисоките етички стандарди во нашите маркетинг и промотивни кампањи. Ниту еден измислен и апсурден правен аргумент не може да го сокрие фактот дека обожавателите сами ја избираат музиката што сакаат да ја слушаат“, велат од издавачката куќа.