Драмски театар со претставата „Гидионовиот јазол“ на 16 мај ќе гостува на фестивалот РУТА во Сараево, Босна и Херцеговина. Од 12 до 17 мај во организација на „Камерни театар 55“ се одржува босанско-херцеговското издание на регионалниот театарски фестивал РУТА.

Премиерата на „Гидионовиот јазол“ беше на 9 мај и гостувањето во Сараево ќе биде петта изведба и прво гостување на претставата во странство. По претставата со актерите и уметничкиот дел од екипата ќе се организира тркалезна маса, отворена за новинарите и театарската публика.

Претставата „Гидионовиот јазол“ на режисерката Драгана Милошевски Попова е работена по текст на авторката Џона Адамс. Драматург е Викторија Рангелова – Петровска, инспициент Гоце Бојчев, а суфлер Жаклина Цветковска.

Улогите ги играат актерите Биљана Драгиќевиќ Пројковска и Ања Митиќ, како и децата од Студиото за актерска игра „Прва проба“: Саша Димитриевска, Леа Стојков, Мина Ѓаку, Ина Прокоповска, Катја Бешлиева, Бистра Стефановска, Јана Нешевска, Матеј Марковски и Јоанис Далајоргос.

Режисерката Драгана Милошевски Попова во програмската белешка истакнува дека: „Претставата ’Гидионовиот јазол‘ е моќна и вознемирувачка приказна за вината, одговорноста, тагата и сложениот однос во комуникацијата, како и состојбите во образовниот систем, проблемите со кои се соочува детето низ периодот на детството. На училишна средба меѓу мајката Корин и наставничката Хедер, кој се случува по еден трагичен настан, преку деликатен, емотивно исполнет/напнат дијалог, се отвораат прашањата за детската креативност, слободата на изразување, за уметноста, за одговорноста на наставниците и за родителите, за социјалните мрежи, за врсничкото насилство, за осаменоста, преку кои постепено се разоткрива длабоката болка и се бара, па и се посочува можниот виновник“.

Авторката Џона Адамс е претставничка на новата генерација американски драмски автори. Дипломира на Универзитетот „Де Паул“ (De Paul University) во Чикаго, магистрира на Факултетот „Хунтер“ (Hunter College) во Њујорк. Таа е авторка на 20 драмски текстови во кои драмската структура ја гради преку исклучително јаки и богато нијансирани карактери и ги поставува во сложени меѓусебни психолошки ситуации. Тематски обработува општествено актуелни прашања.

Нејзини најпознати дела се: „Гидионовиот јазол“ (Gidions Knot) со повеќе од 40 премиерни изведби низ целиот свет, како и „Светски градители“ (World Buillders), „Без милост“ (Sans Merci), „Ангел јадач“, трилогија (The Angel Eaters Trilogy). Друштвото на американските театарски критичари ѝ ја доделува наградата „Стинберг“ (Steinberg Award) за делото „Гидионовиот јазол“.

Наредните изведби на претставата „Гидионовиот јазол“ се на редовниот репертоар на Драмски на 23 и 31 мај, известија од Драмски театар Скопје.