ДРАМАТИЧНО ВИДЕО: Поплавени села во Грција, децата ги носат со чамци, жителите чекаат на покривите да ги извлечат со хеликоптери
По налетот на силното невреме „Даниел“ драматична е состојбата во Кардичката рамнина, во Тесалија. Речиси сите села во округот Кардица се под вода поради обилните врнежи кои продолжија и во средата од утринските часови.
Во многу села во општина Паламас, луѓето се евакуираа на покривите од куќите или на повисоки места и бараат помош. Децата ги превезувале на гумени чамци по поплавените улици во селата. Состојбата во месноста Метаморфоси е потресна.
Побарана е интервенција од вооружените сили на грчката армија, а за евакуација на граѓаните се бараат и хеликоптери.
Сликата во градот Кардица е подобра, но повторно почна да врне пороен дожд кој предизвика голема загриженост кај жителите.
„Сигурен сум дека ќе имаме давеници“, вели градоначалникот на Паламас.
„Ситуацијата е трагична. Денеска ова е крај на општината, умре. Ние сме беспомошни. Луѓето се заробени во куќата, водата надмина 1,5 метари. Ќе имаме давеници, секаде сум упатувал апели. Ми се јавуваат десетици жители и бараат помош. Секако дека не се сите во добра здравствена состојба, сигурен сум дека ќе имаме давеници“, изјави за СКАИ градоначалникот на Паламас, Јоргос Сакелариу.
„Посебно се погодени Паламас и Метаморфози во Кардица, се обидуваме да пристапиме од страната на Итеа. Одиме со возила да ги евакуираме луѓето кои се во куќите бидејќи областа е поплавена. Пристапот е тежок, имаме многу обилни врнежи“, изјави претставникот на противпожарната служба, Јанис Артопиос.
Претходно утринава беше испратена порака до жителите на Паламас Кардица со цел да се оддалечат од подземните и приземните површини на објектите.
Конкретно, во пораката на службата за итни случаи 112 се вели: „Ако сте во Паламас, оддалечете се од подземните и приземните површини на зградите поради развојот на поплави во областа. Следете ги упатствата на властите“.