Издавачката куќа „Или-Или“ во рамки на едицијата „И ете приказна“ ја објави книгата за деца „Мачето Мице“. Станува збор за топла и разиграна збирка раскази од авторката Татјана Гаврилова.

Книгата раскажува за домашните авантури на љубопитното маче Мице – палаво, весело и секогаш во движење. Низ десет посебни приказни, читателите ги следат неговите обиди да го истражи светот околу себе, да се справи со нови ситуации, да научи важни лекции и – најчесто – да направи по некоја беља.

Раскажувач на приказната е Ема, девојче кое живее со своето семејство и го споделува секојдневието со Мице. Преку нејзиниот детски глас се доловува атмосферата на едно типично, но волшебно семејно домаќинство полно со љубов, игра и разбирање. Во фокусот на приказните се вредности како што се пријателството, храброста, емпатијата и значењето на семејството.

Истовремено, книгата нуди и доза хумор, авантура и препознатлива детска динамика, што ја прави идеална за читатели на возраст од 5 до 10 години. Приказните се визуелно збогатени со живописни илустрации на Јана Борбала Панзов.

(Текстот е објавен во „Културен печат“ број 278, во печатеното издание на весникот „Слободен печат“ на 26-27.4.2025)