Доколку помирувачот не најде решение, Синдикатот на УЈП ќе ја активира одлуката за генерален штрајк
Доколку не се изнајде решение за неколку денови, ќе се активира одлуката за генерален штрајк, при што ќе ги искористиме сите можности што ни се на располагање, порачаа од Синдикатот на Управата за јавни приходи.
Васе Неданоски од Синдикатот на УЈП потсети дека помирувачот, кој е предложен од нив, веднаш бил прифатен од Министерството за финансии и чекаат да ги повика на разговор.
Тој е должен во рок од три дена да го врати мандатот доколку не може да најде решение. Доколку сегашниот помирувач не е во земјава и не може да го спроведе помирувањето, на негово место може да се назначи друг. Но, очекуваме за пет до шест дена да заврши процедурата за помирување, изјави Неданоски за МИА.
Тој додаде дека не се дел од одбраната или внатрешните работи, па да имаат ограничување за тоа што смеат, а што не смеат да прават за време на генерален штрајк.