Поранешниот градоначалник на Њујорк и близок соработник на американскиот претседател Доналд Трамп, Руди Џулијани, денеска допатува во Бања Лука, каде се сретна со водачот на босанските Срби, Милорад Додик. Џулијани пристигна за да го поддржи Додик во пресрет на изрекувањето на пресудата во постапката поведена поради непочитување на одлуките на високиот меѓународен претставник во БиХ, пишува „Политика“.

Според соопштението од кабинетот на Додик, соговорниците од Република Српска му се пожалиле на поранешниот градоначалник на Њујорк, обвинителот и адвокатот на Трамп дека „прогонот на кој биле подложени тие и Додик во Босна и Херцеговина и Трамп во САД е „дел од истата матрица на притисоци со коишто се настојува да се дисциплинираат лидерите кои не се согласуваат со глобалистичките диктати“.

„Оваа посета дополнително потврдува дека Република Српска не е сама во борбата за зачувување на политичката и институционалната автономија и дека се повеќе луѓе на меѓународната сцена ги препознаваат двојните стандарди и притисоци на кои е изложена“, се вели во соопштението.

Џулијани, поранешниот бранител на Трамп, беше обвинет во САД во повеќе случаи за обиди за местење на претседателските избори во американските држави Џорџија и Аризона, а Адвокатската комора на Њујорк му ја одзеде лиценцата поради давање лажни изјави околу изборите во 2020 година. Адвокатската лиценца на Џулијани му беше одземена и во Вашингтон, поради обиди да ги преиначи резултатите од изборите. Во јануари, тој избегна судење за клевета, откако две службенички на изборната комисија во Џорџија го тужеа за клевета поради неговите лажни изјави дека тие работеле на местење на изборните резултати. Џулијани се спогоди со службеничките, согласувајќи се да им плати 148 милиони долари, за да не оди во затвор.

Додик и директорот на Службениот весник на Република Српска, Милош Лукиќ, се обвинети дека овозможиле објавување на два закона кои беа усвоени од парламентот на Република Српска и покрај тоа што високиот претставник за БиХ, Кристијан Шмит, претходно ги поништи, што според законите во БиХ може да резултира со казна затвор до пет години, а осудата во случајот на Додик би значела автоматско смена од функцијата претседател на Република Српска. Исто така, за Додик е побарана и забрана за извршување политички функции.

Обвинителството на БиХ против нив поднесе обвинение во август 2023 година, а судењето започна пред една година, во февруари лани.

Додик, инаку, не го признава легимитетот на Шмит бидејќи тој е именуван без редовната дискусија во Советот за безбедност на Обединетите нации, за што има поддршка од Русија и Кина како постојани членки на Советот.

Додик претходно изјави дека нема да присуствува на изрекувањето на првостепената пресуда пред Судот на БиХ во среда. Парламентот на Република Српска во среда ќе започне дводневно заседавање, а во центарот на Бања Лука се организира митинг за поддршка на Додик.

Бошњачкиот член на Претседателството на БиХ, Денис Беќировиќ, во понеделникот во разговор со шефот на Делегацијата на ЕУ во БиХ, Луиџи Сорека, предупреди за наводни закани за стабилноста на земјата, повикувајќи ја ЕУ да го зголеми присуството на воените сили на ЕУФОР.

НАТО и ЕУФОР се на нозе во Босна, ќе спречуваат можни немири ако Додик биде осуден