Македонскиот голман Столе Димитриевски има важечки договор со Рајо Ваљекано до 30 јуни 2024 година. И оваа сезона е прва голманска опција на Рајо кој со добри резултати во текот на оваа сезона од одамна го обезбеди опстанокот во „Ла Лига“, односно моментно е на 11 позиција со 46 бодови, иако во последните пет натпревари претрпе три порази.

Димитриевски кој сезонава во шпанското првенство до сега запиша 34 настапи, во интервју за шпанските медиуми кажа дека сака да остане во клубот.

– Им кажав на клубот дека сакам да останам. Кога би можел да потпишам договор до 2029 година, би го потпишал. И кога би можел да потпишам договор за започнување на тренерска кариера, би го потпишал. Би останал овде до крајот на мојот живот бидејќи се чувствувам многу благодарен и многу добро во клубот. Ме ценат, ми се укажа можност и се трудам да го искористам најдоброто од себе за клубот – вели Димитриевски.

До крајот на сезоната во „Ла Лига“ тимот од Мадрид ќе игра уште против Реал в среда (24 мај) на „Сантјаго Бернабеу“, потоа на 28 мај ќе го пречека Виљареал, а на 4 јуни ќе гостува кај Мајорка.

Следниот месец нашиот чувар на мрежата го очекуваат нови репрезентативни обврски и дуелите со Украина и Англија во квалификациите за ЕП 2024.