Македонскиот репрезентативец Елиф Елмас за првпат беше капитен на италијанскиот гигант Наполи во денешниот пријателски натпревар против Јуве Стабија. „Наполитанците“ ја оправдаа фаворитската улога славејќи со конечен резултат 3:0.

На овој дуел за клубот од Неапол настапија и новите летни засилувања Симеоне, Распадори и Ндомбеле. Токму позајмениот фудбалер од Тотенхем, Ндомбеле ја започна гол серијата во второто полувреме, поточно во 57 минута.

За 2:0 се погрижи Амброзино во 82 минута, а конечниот епилог го поставо Зерби во самиот финиш од средбата (90+3`).

– Ова е уникатно чувство за мене, да ја носам капитенската лента на Наполи. Благодарност до навивачите кои ни ја дадоа поддршката на овој контролен меч. Новите засилувања се квалитетни и сигурен сум дека одлично ќе се вклопат – рече Елмас по завршувањето на натпреварот.

Составот предводен од тренерот Лучано Спалети за четири дена ќе имаат нов дуел во Серија А, односно ќе ѝ гостуваат на Фиорентина.