Преживеаните од масакрот во 2019 година во маркетот „Волмарт“ во Тексас, во кој загинаа 23 лица, а повредени беа уште 22 други, директно му се обратија на убиецот на сослушувањето на пресудата во средата, вклучително и едно младо девојче кое наводно му рекло: „Сакам да те видам мртов“.

Сослушувањето за изрекување на пресудата пред американскиот окружен судија Дејвид Гуадерама во Ел Пасо би можело да трае неколку дена со оглед на тоа што на секој сведок, преживеан или роднина на загинатите ќе им се даде шанса да понудат изјава за влијанието, пренесува „Ројтерс“.

На убиецот, Патрик Крусиус (24), кој призна дека сакал да убие луѓе со латиноамериканско потекло, ќе му биде дозволено да се обрати пред судот. Тој се изјасни за виновен во февруари за 90 точки од обвинението, вклучително и 23 точки од обвинението за злосторство од омраза што резултирало со смрт, според договорот за признавање на вината во кој се согласи на 90 последователни доживотни затворски казни за да ја избегне федералната смртна казна.

Дури и со тој договор, судијата мора да спроведе рочиште пред да изрече казна. Убиецот, исто така, се соочува со гонење од државата Тексас што може да резултира со смртна казна.

Убиецот, облечен во сина затворска униформа, очила и бушава долга коса, не покажал никакви емоции и избегнувал да гледа во жртвите, објавија новинарите.

Џенесис Давила, која имала 12 години и била присутна додека нејзиниот фудбалски тренер бил убиен, а мајка и и татко и биле повредени, погледнала директно во Крусиус и му рекла: „Сакам да те видам мртов“, објави телевизијата „КВИА“.

„Толку многу те мразам. Пеколот има посебно место за тебе“, рече Давила.

Непосредно пред масакрот убиецот објавил на социјалните мрежи дека: „Овој напад е одговор на шпанската инвазија на Тексас“.