Американската адвокатка и поранешна федерална обвинителка Неама Рахмани тврди дека признанието на принцот Хари дека се дрогирал во текот на животот може да ја загрози неговата американска виза, пишува „Дејли мејл“.

Имено, војводата од Сасекс во своите мемоари „Резерва“, но и во некои телевизиски гостувања, призна дека користел кокаин, марихуана и халуциногени печурки во минатото.

Фондацијата „Херитиџ“, која е конзервативен аналитички центар во Вашингтон, се обидува да открие дали принцот Хари навел дека користел дрога при поднесувањето на барањето за виза. Покрај тоа, фондацијата „Херитиџ“ се обидува да ја добие целата кореспонденција меѓу американските претставници и британскиот принц.

Американските власти засега одбиваат да објават детали за барањето на принцот.

Доколку дојде до лажење на имиграционата служба, американските закони се прилично строги. Лицето кое е фатено како лаже може да биде депортирано и може да му биде ускратена можноста да аплицира за американско државјанство.

„Признавањето на лицето дека земало дрога обично е основа за одбивање на барање за виза. Ова значи дека на принцот Хари не требало да му биде издадена виза, а ако му била издадена, таа треба да биде укината“, вели адвокатката Рахмани.

Рахмани рече дека нема исклучоци, без разлика дали се работи за член на британското кралско семејство или за рекреативна употреба на дрога.

Сепак, адвокатот специјализиран за имиграциони прашања, Сем Адаир вели дека признанието на принцот веројатно нема да биде проблем бидејќи тој нема осуди за поседување или користење дрога.

Принцот Хари раскажа дека користел марихуана и халуциногени печурки за подобро да се справи со „траумите“ и дека тие му помогнале. Земал кокаин во социјални прилики.

Директорот на фондацијата „Херитиџ“, Мајк Хауел вели дека барањето поднесено од аналитичкиот центар е „прашање од јавен интерес“.

„Сакаме да дознаеме дали принцот Хари бил темелно проверен пред да влезе во САД“, додаде Хауел.

Повеќе вести за принцот Хари:

Скандалозните мемоари на принцот Хари преведени на македонски јазик

Принцот Хари призна во книгата: Пушев марихуана додека Меган и Арчи спиеја

Принцот Хари за децата на брат му: Барем едно од нив ќе биде резерва како мене