Сигурно ви се случило да се разбудите пред алармот, изнервирани затоа што сте „лишени“ од неколку минути сон. Но, дали некогаш сте се запрашале што го предизвикува?

Науката има објаснување, а виновниците се вашиот „телесен часовник“ – или „внатрешен часовник“, како и протеинот ПЕР, кој го регулира циклусот сон-будење.

Нивото на наведениот протеин се зголемува и опаѓа во текот на денот. Кога нивото на ПЕР е ниско, крвниот притисок се намалува, отчукувањата на срцето се забавуваат, функциите на телото се забавуваат и се чувствувате поспано.

Ако постојано се придржувате до „распоредот за спиење“, вашето тело ќе се прилагоди и ќе го подигне нивото на протеини пред да се вклучи алармот, пишува „Дејли стар“.

Околу еден час пред будењето, нивото на ПЕР се зголемува, заедно со телесната температура и крвниот притисок. Подготвувајќи се за новиот ден, телото ослободува хормони на стрес (кортизол). Како резултат на тоа, вашиот сон постепено станува „полесен“, па се будите пред да се вклучи алармот.

Кога би ги отвориле очите поради алармот, тоа би предизвикало одреден стрес, па организмот прави нешто несекојдневно. Постепено го зголемува нивото на ПЕР и води до будење неколку минути, па дури и секунди, пред „неславното“ ѕвонење.