Србија го осудува рускиот напад врз Украина и не е политички неутрална во таа прилика, изјави српскиот министер за надворешни работи Ивица Дачиќ за Гласот на Америка.

„Гласавме за сите резолуции кои беа во Обединетите нации и во некоја друга меѓународна организација со кои се осудува кршењето на територијалниот интегритет на Украина“, рече Дачиќ на прашањето за непочитувањето на одлуката на Европскиот совет од страна на Србија за продолжување на ембаргото против Русија поради анексијата на Крим и Севастопол во 2014 година.

Дачиќ, кој како член на српската делегација престојува во Њујорк на 78. заседание на Генералното собрание на Обединетите нации, во таа насока нагласи дека прашањето за територијалниот интегритет и суверенитет стана важна тема во меѓународните односи.

„И тогаш се прашуваме дали тоа важи и за нашиот случај, а очигледно не е така. И тогаш гледате дека има двојни стандарди и стандарди. И кога го поставувате тоа прашање, треба да се грижите за вашите државни и национални интереси, кога разговарате за мерките или активностите што ги преземате на мултилатерално ниво“, рече Дачиќ.