Дачиќ: Сè уште нема одлука за формирање на Влада, ништо ново во меѓувреме
Министерот за надворешни работи на Србија и лидер на СПС, Ивица Дачиќ изјави дека сè уште нема донесено одлука за формирање на Влада и најави дека главна тема оваа недела ќе биде доаѓањето на американската развојна агенција (ДФЦ) во Белград.
Дачиќ повтори дека СПС е горда на постигнатите резултати во изминатите осум години и дека се подготвени за продолжување на соработка со Александар Вучиќ и Српската напредна партија (СНС).
– На победниците на изборите е процесот за формирање на Влада и носењето на одлука. Таа одлука сè уште не е донесена и ништо ново не се случи во меѓувреме, порача Дачиќ.
Тој додаде дека нема информација кога би била формирана новата Влада, наведувајќи дека од најавата за договор во меѓувреме се случија низа надворешно-политички настани како Вашингтонскиот договор и разговорите во Брисел.
– Сега имаме пристигнување на ДФЦ и сигурен сум дека тоа ќе биде централна тема оваа недела. Во секој случај, имајќи ги во предвид роковите, процесот за формирање на Влада не е доведен во прашање. Мнозинство има СНС и на нив останува да донесат одлука, барем што се однесува до СПС-ЈС“, рече Дачиќ.