Четвртата доза вакцина против коронавирусот која ја примиле луѓе постари од 60 години во Израел, ги прави трипати поотпорни на сериозна форма на болеста од луѓето кои примиле трета доза, соопшти денеска израелското Министерство за здравство, повикувајќи се на прелиминарните резултати од истражувањето на медицинскиот центар Шеба.

Оттаму додаваат дека четвртата доза, или вториот „бустер“, ја удвоил отпорноста на заразување со вирусот во истата старосна група, во споредба со луѓето кои примиле три дози од вакцината, јавува Ројтерс.

Израел овој месец почна со давање на четвртата доза од вакцината на Фајзер/Бионтек на луѓето постари од 60 години.

Кај луѓето кои ја примиле четвртата доза, антителата биле со уште повисоко ниво од оние со примена „бустер“ доза, но според истражувачите, тоа „веројатно“ не е доволно тие да бидат целосно заштитени од заразување со високопреносливиот сој омикрон.