Општина Центар ќе доделува субвенции од најмногу 1000 денари за сите жители на општината кои сакаат да купат дополнителна опрема за велосипеди, односно седишта за деца или кациги за велосипед, е-велосипед и е-тротинет во 2023 година.

Јавниот повик е распишан денеска и ќе трае сѐ до исцрпување на средствата што се предвидени во општинскиот Буџет, а субвенциите ќе се доделуваат по принципот ,,прв дојден – прв услужен“. Ќе се надоместува 30 отсто од цената за купување дополнителна опрема, но најмногу до 1.000 денари.

За субвенции ќе може да аплицира секој полнолетен жител на Центар што купил дополнителна опрема, односно седишта за деца или кациги за велосипед, е-велосипед или е-тротинет, во периодот од 1 август годинава.

Правото на субвенција е еднократно, а за сите потребни документи и начинот на аплицирање граѓаните можат да се информираат на веб страницата на Општина Центар, каде што е објавен јавниот повик.