Членовите на бугарската парламентарна делегација во Парламентарното собрание на Советот на Европа (ПССЕ) за реакција го искористија вчерашното обраќање на македонскиот пратеник Александар Николоски во кое тој ја критикуваше Бугарија за неспроведување на пресудите на Европскиот суд за човекови права (ЕСЧП) во Стразбур што се однесуваат на Македонците во Бугарија.

Како што дознаваме од извори од ПССЕ, бугарските пратеници од редовите на групата на Европската народна партија (ЕПП) утрово на состанокот на групата остро протестирале кај претседателот на политичката група, Александар Почиеј од Полска, но и до пратеникот Александар Николоски. Нивната реакција била затоа што во вчерашното обраќање на Николоски на дебатата за Резолуцијата за Конвенцијата за човекови права и национални устави тој како потпретседател зборувал во името на групата на ЕПП и притоа ја критикувал Бугарија за неспроведувањето  на пресудите на ЕСЧП. Нивното образложение било дека тоа не е став на ЕПП, а за да се изнесе како став на групата потребно е гласање.

Пратеникот Николоски потврди дека ова се случило на состанокот на групата и дека бугарските пратеници реагирале.

-Членови на бугарската делегација во Европската народна партија го покажаа своето ниско ниво на комуникација. Наместо да работат на спроведување на пресудите на Судот во Стразбур, а кои се однесуваат на Македонците во Бугарија, тие реагираа во Европската народна партија зашто јас сум избран во име на ЕПП да зборувам, вели Николоски во изјава за „Слободен печат”.

Според него, ваквата реакција е само потврда на нивниот негаторски однос кон Македонците.
Николоски во вчерашното обраќање посебно се осврна на случајот со Бугарија, која, како што рече, не ги почитува обврските како земја членка на Советот на Европа.

-Со години Бугарија одбива да ги спроведе пресудите на ЕСЧП. Има 16 пресуди на Судот кои што се однесуваат на Македонците во Бугарија, а кои не се спроведени. На Македонците им е забрането да го користат и да го учат нивниот мајчин јазик, им се забранува правото на здружување, како и учество на избори. Овие пресуди мора да се спроведат. Националниот устав и суд не можат да бидат над пресудите од Европскиот суд за човекови права, рече Николоски.

Според него, домашните институции не успеале да ги заштитат човековите права на Македонците во Бугарија, па тие во Стразбур ја гледаат својата надеж за почитување на основните човекови права.

Забелешка за неспроведување на пресудите на ЕСЧП има и во годишниот извештај на комесарката за човекови права, Дуња Мијатовиќ. Според неа, целосно спроведување на пресудите на Судот е обврска за земјите членки на Советот на Европа, а неспроведувањето е спротивно на заложбите за почитување на човековите права.

Во последниот извештај на Комитетот на министри на Советот на Европа се наведува дека на крајот од 2022 година имало 6.000 неспроведени пресуди. Неспроведувањето на пресудите, пак, резултира со повторни кршења на човековите права.