Не се работи за геостратешко поместување на државната позиција во односите со соседите, туку откажувањето на изградбата на пругата со Бугарија од страна на македонската Влада е чисто економско прашање, сметаат експертите коишто ги контактиравме.

Владата минатата недела се откажа од изградбата на железничката сообраќајница кон Бугарија, со образложение дека не постои економска оправданост за изградбата, наведувајќи дека средствата од овој проект ќе бидат пренаменети во проектирањето на т.н. „јужна пруга“, со која Македонија е предвидено да го модернизира Коридорот 10, на релација север-југ.

Оваа одлука од многумина беше окарактеризирана како геостратешко поместување на интересите на Македонија, која наместо со Софија, сега ќе добие брз воз со Белград. Дури и специјалниот германски пратеник за Западен Балкан, Мануел Сарацин, реагираше на одлуката на нашата Влада, потенцирајќи дека европскиот транспортен Коридор 8 е од стратешко значење за регионот.

– Транспортните коридори во Европа се во надлежност на Брисел. Лично верувам дека не е во надлежност на една земја да ги менува европските приоритети во транспортната политика. Ова е долг и комплициран процес со многу различни договори. За време на моите разговори во Софија, разбрав дека Бугарија е збунета, но и загрижена од ова барање на Скопје. Изградбата на Коридорот 8 секако е од стратешко значење – изјави Сарацин.

Сепак, домашните експерти оценуваат дека оваа одлука на Владата е пред сè економска и како таква треба да се третира.

Аналитичарот Синиша Пекевски смета дека подобрата економска соработка со Србија е главната причина за промената на приоритетите во поврзувањето со железничкиот сообраќај.

– Не би рекол дека е заземање на поинаква стратешка позиција туку повеќе ја гледам економската страна и подоброто поврзување на север каде имаме поголема и подобра економска соработка. Но истовремено покажуваме и благодарност до оние кои ни помагаат во изминатиот период и покажуваат кој ни е вистински партнер и поддржувач, за разлика од Бугарија која континуирано нѐ блокира. Македонија ќе мора во иднина да изнајде средства и да ја изгради пругата кон Бугарија, бидејќи со тоа ќе покаже и големина и желба да се движи кон иднината – вели Пекевски за „Слободен печат“.

Политикологот Иво Ранѓеловиќ се согласува дека модернизацијата на пругата што води кон Грција и кон Србија нема да значи и поголемо поместување од геостратешките позиции на земјата.

– Сметам дека држава од 200 километри помеѓу две граници не би требало да развива геополитика преку инфраструктура, особено ако го уважиме фактот дека Македонија е земја во развој, а не развиена земја. За таа цел, важно да се реализираат и двата проекти, изградба на Коридорот 8 и модернизарција на Коридорот 10, за што и самата меѓународна заедница е финансиски и политички расположена. Кога веќе се задолжуваме во континуитет, можеби е добро распределбата на средства да се насочува кон вакви проекти, кои покрај нивната висока цена, сносат и голем потенцијал за поврат на влогот, но и развој на руралните делови на државава – нешто што нѐ мачи со години. Номинални се обвинувањата за пренасочувањето на средствата кон Коридорот 10, што се толкува како приближување на политиките кон Белград, а одалечување од Софија, затоа што судбината на секоја членка на ЕУ е комплетирање на стратешките проекти за инфраструктурен развој – изјави Ранѓеловиќ за „Слободен печат“.

Од Владата, покрај неисплатливоста на проектот, како една од главните причини за откажувањето од проектот наведоа и дека од бугарска страна во меѓувреме не е направен посериозен исчекор во градежните работи на железничката инфраструктура.