„Бритиш ервејс“ откажа уште 10 илјади летови од и до Хитроу поради недостигот на персонал
Бритиш ервејс најави уште една рунда откажувања на авионски летови, укинувајќи 10.000 летови до и од Хитроу до крајот на март следната година, прилагодувајќи се на постојаниот недостиг на персонал што ја погоди авијацијата, пренесува „Гардијан“.
Одлуката на авиопревозникот да го намали својот возен ред за кратки дестинации за 8% доаѓа откако лондонскиот аеродром го продолжи летното ограничување од 100.000 дневно на бројот на патници за уште шест недели до крајот на октомври и побара од авиокомпаниите да продаваат помалку летови.
Потегот на Хитроу дојде откако авиокомпаниите две години се справуваа со кризата предизвикана од пандемијата, борејќи се да најдат персонал за да ја задоволат повратната побарувачка од деловните патници и туристите, што доведе до хаос и долги редици за празниците.