Тројца британски државјани се соочуваат со можност за смртна казна откако се појавија на суд на Бали под обвинение за шверц на речиси еден килограм кокаин во Индонезија.

Џонатан Кристофер Колиер и Лиза Елен Стокер биле уапсени на 1 февруари, кога царинските службеници ги запреле на рендгенски преглед на аеродромот. При претрес на багажот биле откриени сомнителни супстанции кои подоцна биле идентификувани како кокаин, објави „Скај њуз“.

Лабораториската анализа покажала дека во 10 кесички прашок за инстант десерт од багажот на Колиер и дополнителни седум во куферот на Стокер, содржеле вкупно 993,56 грама кокаин, чија пазарна вредност се проценува на шест милијарди индонезиски рупии, односно околу 272.000 британски фунти.

Третиот обвинет, 31-годишниот Финеас Амброуз Флоут, бил уапсен два дена подоцна. Дрогата наводно му била предадена на паркинг пред хотел.

Обвинителот тврди дека кокаинот пристигнал во Индонезија од Англија преку Катар, додека началникот на одделот за наркотици на полицијата на Бали, изјави дека истата група веќе двапати успешно прошверцувала кокаин во земјата.

Индонезија е позната по своите екстремно строги закони за дрога, а трговијата со дрога често е казнива со смрт – обично со стрелање.

Според индонезиското Министерство за имиграција и казнени институции, во моментов има околу 530 лица кои чекаат смртна казна, вклучувајќи 96 странци.