Десниот бек од Босна и Херцеговина, Павле Петровиќ (25), ќе ја продолжи својата кариера во Линц, Австрија, почнувајќи од ова лето, пренесува Балкан-Хандбал.

Леворакиот ракометар пристигна во Еурофарм Пелистер како член на вториот тим уште во јануари 2021 година.

Со добри настапи, тој накратко си обезбеди место во првиот тим и играше во Лигата на Европа и Лигата на шампионите, но на почетокот од оваа сезона стана јасно дека клубот не смета сериозно на неговите услуги во силната конкуренција на Хосни и Цехте на позицијата десен бек.

Во еден момент од есента, за неговите услуги беше заинтересиран и Партизан, но првите луѓе на Еурофарм Пелистер не беа решени да го пуштат, па „црно-белите“ се свртија кон други решенија на пазарот.

Тимот од Линц ја заврши регуларната сезона од првенството на шестото место, а сега се квалификуваше за полуфиналето од плеј-офот каде што ќе се сретне со Кремс.